पुणे : एका अभूतपूर्व संकटामुळे निर्माण झालेल्या संक्रमणकाळाचा अनुभव सध्या सारे जग घेत आहे. या कठीण काळातून तरण्यासाठी प्रत्येक जण आपापल्या परीने धडपड करतो आहे. जगण्याची ही धडपड सुकर करण्याचे, तिला दिशा दाखवण्याचे काम करतात चांगले विचार आणि सकारात्मक दृष्टिकोन. पुस्तके हा या दोन्हींचा मुख्य स्रोत आहे. म्हणूनच, ‘रीडिंग वॉल’च्या माध्यमातून विविध विषयांवरचे दर्जेदार साहित्य मोबाइलवर मोफत उपलब्ध करण्याचा उपक्रम बुकगंगा पब्लिकेशन्सने राबविला आहे. या व्यतिरिक्त जगभरातील लेखकांना स्वतःचे लेखनही या ‘वॉल’वर प्रसिद्ध करता येणार आहे.
कठीण काळात चांगली पुस्तके खऱ्या सोबत्याचे नाते निभावतात आणि ते नाते तयार करण्याचे सगळे श्रेय असते अर्थातच लेखकांचे. हे नाते दृढ करण्यासाठी बुकगंगा प्रकाशनाच्या लेखकांचे दर्जेदार साहित्य मोफत उपलब्ध करण्यात आले आहे.
https://www.readingwall.com/main/ebooks या लिंकवर ते उपलब्ध आहे. मानसिक-शारीरिक आरोग्यविषयक, कथा, कविता, कादंबरी, ललित, लहान मुलांसाठीच्या गोष्टी अशा विविध विषयांवरचे मराठी साहित्य या रीडिंग वॉलवर मोफत उपलब्ध आहे. साहित्याचा हा खजिना प्रत्येकाला या कठीण परिस्थितीत बळ देईल, अशी आशा बुकगंगा पब्लिकेशन्सने व्यक्त केली आहे.
(पुस्तकांची यादी बातमीच्या शेवटी दिली आहे.)
मोबाइल, कम्प्युटर, लॅपटॉप अशा कोणत्याही गॅजेटवर हा खजिना उपलब्ध आहे. ही पुस्तके घरातील सर्वांना वाचता येतील, लहान मुलांना, घरातल्या वयस्कर व्यक्तींना वाचून दाखवता येतील आणि वाचनाचा एकत्रित आनंद घेता येईल. करोनाच्या या संकटामुळे अगणित वाईट गोष्टी घडल्या आणि घडतही आहेत; पण त्यातून एक चांगली गोष्ट घडते आहे, ती म्हणजे या संकटामुळे माणसे शरीराने दूर असली, तरी मनाने जवळ येत आहेत. नात्यांचे हे बंध अधिक दृढ करण्याचे काम साहित्याचा हा खजिना करू शकेल, असा विश्वास व्यक्त करण्यात आला आहे. त्यामुळेच ‘रीडिंग वॉल’ची माहिती जास्तीत जास्त लोकांपर्यंत पोहोचविण्याचे आवाहन ‘बुकगंगा’तर्फे करण्यात आले आहे.
तुम्हीही येथे लेखन करू शकता...
या पुस्तकांव्यतिरिक्त प्रवासवर्णने, व्यक्तिचित्रे, प्रेरणादायी व्यक्तिमत्त्वांच्या संघर्षकथा, कविता, पाककृती, आहार, पोषण, पर्यावरण, ललित अशा विविध विषयांवर नामवंत लेखकांनी केलेले दर्जेदार लेखन या रीडिंग वॉलवर उपलब्ध आहे. तसेच, यावर अकाउंट तयार करून जगभरातील कोणीही लेखक त्याचे साहित्य या वॉलवर प्रसिद्ध करू शकतो. तसेच, त्याचे आधीचे लेखनही येथे पोस्ट करू शकतो. त्यामुळे त्या लेखकांचा वाचकवर्ग वाढण्यास मदत होईल आणि वाचकांना अधिकाधिक चांगले साहित्य उपलब्ध होत जाईल.
सध्या या वॉलवर मराठी भाषेतील विपुल साहित्य उपलब्ध आहे. येत्या काळात इंग्लिश, हिंदी, बंगाली, गुजराती, कन्नड, मल्याळम्, पंजाबी, तमिळ, तेलुगू या भाषांतील साहित्यही यावर उपलब्ध केले जाणार आहे. त्यामुळे जास्तीत जास्त लेखकांनी या उपक्रमात सहभागी होऊन, ही ‘रीडिंग वॉल’ अधिक मजबूत करत न्यावी, असे आवाहन ‘बुकगंगा’चे संस्थापक मंदार जोगळेकर यांनी केले आहे.
खालील पुस्तके सध्या रीडिंग वॉलवर मोफत उपलब्ध असून, आणखीही अनेक पुस्तके लवकरच उपलब्ध होणार आहेत.
सातमाईंचे रान - आयडा बॅरेटो (कादंबरी)
अवघे हरिमय योगबळे - सुधीर काळे (आध्यात्मिक)
बी पॉझिटिव्ह - सकारात्मक विचारांचा संग्रह
